Capital do Albariño

 
Elegante, aromático e afrutado, así é o “Príncipe dourado dos viños”, o Albariño. Viño atlántico que marida a terra e o mar das Rías Baixas e se potencia ao velo, ulilo, saborealo, ,… rodeados da contorna na que medran as cepas que os monxes de Cluny trouxeron desde Francia ata o veciño mosteiro de Armenteira (Meis) na Idade Media para converter o lugar no berce do Albariño, aínda que recentes estudos aseguran que é unha cepa orixinaria desta zona.

O paso do tempo, a creación dunha cultura vitivinícola con nome propio, o traballo de centos de empresarios e adegueiros dan fama internacional a este viño de cor dourada e notas frescas que tan ben combina cos produtos do mar e da horta cambadesa. Un embaixador arredor do que se creou un tecido económico que atrae ao visitante a través do turismo do viño. Cambados é a capital do Albariño! É durante a nosa Festa, na primeira fin de semana de agosto, cando se elixe cada ano o mellor albariño do mundo.

O proxecto

 
Cambados Enoturismo é unha plataforma de promoción do enoturismo promovida polo Concello de Cambados, e financiada con fondos europeos a través do Grupo de Desenvolvemento Rural – GDR O Salnés. Está orientada a dinamizar a cultura do viño como un atractivo turístico de interese para este territorio e a súa contorna.

Enténdese como enoturismo as viaxes feitas a carón do mundo do viño, das adegas, das áreas vitivinícolas e dos servizos de hostalería de calidade. Esta plataforma dixital promovida pretende ser unha ferramenta enfocada a potenciar estes aspectos a través da promoción das posibilidades desta terra e da oferta que aquí atopa o viaxeiro, ao tempo que se potencia o sector vitivinícola coma un nicho de emprego e de oportunidades de emprendemento nunha economía vencellada ao desenvolvemento no medio rural e das actividades agrícolas cunha visión nova.

Cambados é un dos 33 concellos da Denominación de Orixen (D.O.) Rías Baixas, intregrado na subzona de producción Val do Salnés. Varias das adegas e establecementos do municipio forman parte da Ruta D.O. Rías Baixas.