Museo do viño. Sala da Historia

Neste espazo preséntanse as diferentes etapas históricas da evolución do viño, en especial na zona do Salnés, a través das diferentes pezas que se expoñen nas vitrinas.

En canto ás orixes da cepa de albariño, existe unha teoría que afirma que era autóctona desta zona do Salnés e tamén outra que fala de que se expande dende o Mosteiro da Armenteira Meis. Na Idade Media ten unha grande importancia por ser considerado o xerme da cultura vitivinícola medieval na comarca.

A través del expándese por todo o val a cepa de vide traída polos monxes da orde de Cluny dende o río Rhin. Considérase o motor difusor da nosa cultura do viño a través das ordes relixiosas e do Camiño de Santiago.

Vai parando en cada unha das dez vitrinas para descubrir pequenos tesouros aquí gardados. Desde o máis antigo, un recipiente púnico datado do século II antes de Cristo; ata a primeira prancha de etiquetado de Albariño do Pazo de Fefiñáns, que foi tamén a primeira adega de viño Albariño.