Museo do viño. Vitrina das botellas

Nesta vitrina expóñense botellas con diferentes motivos decorativos. É moi interesante observar a evolución deste recipiente ao longo da historia, pois ilustra as distintas épocas e culturas da Humanidade.

A arqueoloxía e a investigación histórica descubríronnos moitos útiles coa mesma función aínda que confeccionados con materiais distintos ao vidro. Estes van cambiando segundo o lugar onde se elaboran e os elementos empregados na súa produción. A súa forma tamén evoluciona e se adapta ás súas funcións e usuarios.

No corredor cara a galería atopamos diferentes instrumentos relacionados co cultivo da vide e a elaboración do viño. A pinza para recoller o bagazo, o pisón de madeira para esmagar as uvas no barril, o mazo ou o angazo.