Barrio de Cambados
Paseo por fermosas prazas
O centenario Paseo da Calzada é a unión natural entre as antigas vilas de Fefiñáns e de Cambados e que, xunto o barrio mariñeiro de San Tomé, conforman a actual zona histórica da vila declarada conxunto-histórico en 2001.
Se por algo se caracteriza o barrio de Cambados é pola súas fermosas prazas e antigas casas nobres que albergan espazos públicos. Na Praza do Concello atoparás a estatua de Ramón Cabanillas e a poucos metros, a escultura de bronce de Francisco Leiro dedicada ao deus Baco en homenaxe ao título de “Cambados, capital do Albariño”.
Desde a concorrida praza de Alfredo Brañas diríxete pola igrexa de Santa Mariña (s. XVI, antigo convento de San Francisco) ata os pés do monte da Pastora para atoparte co Museo Etnográfico e do Viño, o primeiro desta temática aberto en Galicia, e coas ruínas do cemiterio de Santa Mariña Dozo. Os restos desta igrexa e do camposanto son Monumento Nacional desde 1943. No ano 2014 conseguiu ser elixido como o terceiro Monumento Funerario máis importante de España, ademais de estar incluído na prestixiosa Asociación de Cemiterios Singulares de Europa (ASCE).
As vistas desde o monte Pastora ben merecen o esforzo de continuar o camiño ata o cumio para ver a panorámica da señorial vila que foches deixando atrás e do marco no que se asenta, a ría de Arousa coa illa da Toxa, o Grove e as bateas de fondo.
