Barrio de Fefiñáns
Marcado carácter nobre
Cambados é coñecida por ser a Capital do Albariño, mais tamén por atesourar un dos conxuntos histórico-artísticos mellor conservados de Galicia. De feito, foi declarado Ben de Interese Cultural pola Xunta de Galicia en 2001. A impoñente e nobre benvida que ofrece a praza de Fefiñáns, epicentro do barrio do mesmo nome, eleva as expectativas da visita a unha vila señorial esculpida en pedra que, durante séculos, se empapou do olor ao viño Albariño e do mar das Rías Baixas.
Neste barrio, a vista e a conciencia detéñense para contemplar o pazo de Fefiñáns (finais do s. XVI – principios do XVII, declarado Ben de Interese Cultural (BIC). O percorrido visual continúa ata a igrexa de San Bieito (tamén BIC), unida co edificio polo único arco-ponte que se conserva dos catro existentes e polo que se accede. A Torre da Homenaxe tamén pertence ao conxunto.
Na actualidade, nos baixos do pazo poden visitarse dúas adegas, a Gil Armada
(que organiza visitas ao interior do edificio) e Palacio de Fefinanes, que foi a primeira que comercializou Albariño con marca e etiqueta.
Co rueiro na man, os pasos guiarante ata a casa-museo do poeta cambadés Ramón Cabanillas, aos xardíns do Pazo de Torrado (s. XVIII) e ata o Pazo de Bazán (s. XVII), convertido en Parador Nacional de Turismo do Abariño.
Cruzando entre as centenarias árbores do Paseo da Calzada para atoparte co mar, un agradable percorrido duns 2 km guiarate polo paseo marítimo ata o Muíño das Mareas da Seca. De fronte, intuirás as bucinas e o trafego do porto de Tragove e da lonxa onde mariñeiros e mariscadoras venden os tesouros cos que maridar o viño Albariño.
Cambados tamén é único porto de Galicia onde se extrae vieira, un molusco ao que se lle dedica unha festa gastronómica de Interese Turístico de Galicia a mediados de xullo.