Municipio de Cambados

 
Situado en plena comarca do Salnés, no centro da Rías Baixas galegas e cunha costa protexida pola ría de Arousa, o benigno clima atlántico que envolve o noso litoral e as nosas vides, explican porqué estas terras son a Capital do Albariño. Centos de adegas, comerciais ou de pequenos viticultores particulares, e tabernas rurais repártense polas cinco parroquias que conforman o municipio: Cambados, Corvillón, Vilariño, Oubiña e Castrelo.

As especiais condicións climáticas de Cambados están tamén influenciadas polo complexo intermareal do río Umia-O Grove, incluído no listado RAMSAR e zona ZEPA de protección para as aves. Aquí estaban as salinas que deron nome á comarca do Salnés.

Con independencia da época estival, calquera momento do ano é ideal para coñecer a nosa pequena vila vitivinícola, aínda que varias son as datas que deberían marcarse en calquera axenda. A Festa do Albariño, na primeira fin de semana de agosto; a festa da vendima, a última fin de semana de setembro; e a festa da colleita, durante a segunda fin de semana de outubro. As tres son unha homenaxe á nosa estreita relación co Albariño.